Mahmudxo‘ja Behbudiy xotirasi yod etildi

Turkiston jadidchilik harakatining yetakchisi, xalqimiz tarixining murakkab damlarida, maʼrifat mashʼalasini baland koʻtarib chiqqan ulugʻ alloma va jamoat arbobi Mahmudxoʻja Behbudiyning ilmiy, ijodiy, pedagogik faoliyati va merosi alohida ahamiyatga molik. XX asr oʻzbek adabiyoti va sanʼatida, ijtimoiy-siyosiy jarayonlarida faol ishtirok etgan, millat maʼrifati, ozodligi, hurligi yoʻlida mardonavor kurashgan bu ulugʻ adibning sermashaqqat va sermahsul faoliyati tarix sahifalaridan mangu oʻrin egalladi, avlodlar uchun ibrat maktabi boʻlib qoldi. 

Shu munosabat bilan Oʻzbekiston xalqaro islom akademiyasi professor-oʻqituvchilari hamda xodimlari Adiblar xiyobonida Mahmudxoʻja Behbudiy xotirasini yod etishdi.

Allomaning haykali yonidagi maʼnaviy-maʼrifiy uchrashuvda oʻzbek jadidchilik harakati yetakchisining hayoti va ijodi, Abdurauf Fitrat bilan olib borgan jadidchilik harakati haqida soʻz yuritildi.

Soʻzga chiqqanlar tomonidan talaba-yoshlarga adib hayoti va ijodi, ilmiy-maʼnaviy faoliyati, Abdurauf Fitratning “Behbudiyning sagʻanasini izladim” nomli marsiyasi haqida qiziqarli maʼlumotlar berildi. 

Oʻzbekiston xalqaro islom akademiyasi 

Matbuot xizmati