Alisher Navoiy tavalludining 582 yilligi nishonlandi

Buyuk shoir va mutafakkir, atoqli davlat va jamoat arbobi Alisher Navoiyning bebaho ijodiy-ilmiy merosi nafaqat xalqimiz, balki jahon adabiyoti tarixida, milliy madaniyatimiz va adabiy-estetik tafakkurimiz rivojida alohida oʻrin tutadi. 

Ulug‘ shoir oʻzining sheʼriy va nasriy asarlarida yuksak umuminsoniy gʻoyalarni, ona tilimizning beqiyos soʻz boyligi va cheksiz ifoda imkoniyatlarini butun jozibasi va latofati bilan namoyon etib, er yuzidagi millionlab kitobxonlar qalbidan munosib va mustahkam oʻrin egalladi. Har yili adib tavalludi mamlakatimiz miqyosida keng nishonlanadi. Bu yilgi tadbir ham an’anaga ko‘ra, poytaxtimizdagi Adiblar xiyobonida bo‘lib o‘tdi.

Alisher Navoiy tavalludining 582 yilligiga bag‘ishlangan marosimda davlat va jamoat arboblari, mamlakatimizda akkreditatsiyadan o‘tgan diplomatik korpus vakillari, shoir va yozuvchilar, adabiyotshunoslar, ijodiy tashkilotlar vakillari, talabalar qatnashdi. 

Mazkur tadbirda O‘zbekiston xalqaro islom akademiyasi professor-o‘qituvchilari hamda xodimlari ham ishtirok etdi. 

Tadbirda buyuk bobokalonimiz ijodining bugungi yosh avlod maʼnaviy hayotidagi tutgan oʻrni xususida soʻz yuritildi. Alisher Navoiy o‘zining boy ma’naviy merosi, shoh asarlari, nodir devonlari, betakror g‘azal va dostonlari bilan bashariyat tamadduni va adabiyotiga beqiyos hissa qo‘shgan e’tirof etildi. Yuksak mahorat va betakror so‘z san’ati ohangida yaratilgan, ulkan tarbiyaviy ahamiyatga ega bo‘lgan bebaho ijod namunalari asrlar osha o‘z mazmun va sayqalini yo‘qotmay, ulkan ma’naviy meros va adabiyotimiz gultojiga aylangani ta’kidlandi.

Adiblar xiyoboni hududida joylashgan Alisher Navoiy haykali poyiga gulchambarlar qoʻyilib, buyuk shoir xotirasiga ehtirom koʻrsatildi.

O‘zbekiston xalqaro islom akademiyasi

Matbuot xizmati