Hamkorlik masalalariga bag‘ishlangan uchrashuv bo‘lib o‘tdi

Har bir soha rivoji, taraqqiyoti yo‘lida o‘zaro yaqin hamkorlik aloqalarining o‘rni muhim. Bu borada esa har ikki tomonlama kelishuvlar bo‘yicha bildirilgan taklif va tashabbuslarni amalga oshirishda hamjihatlik bilan ish ko‘rish, ko‘zlangan ezgu maqsadlarga erishish muvaffaqiyat kaliti bo‘lib xizmat qiladi.

Shu maqsadda bugun O‘zbekiston xalqaro islom akademiyasida Shanxay Hamkorlik Tashkilotining O‘zbekistondagi Xalq diplomatiyasi markazi va Akademiya rahbariyati o‘rtasida tor doiradagi uchrashuv bo‘lib o‘tdi.

Samimiy muloqotda O‘zbekiston xalqaro islom akademiyasi Xalqaro hamkorlik masalalari bo‘yicha prorektori Bahromjon Mamadiyev, Xalqaro hamkorlik bo‘limi koordinatori Durdona Mavlonova, Shanxay Hamkorlik Tashkilotining O‘zbekistondagi Xalq diplomatiyasi markazi direktori Qobuljon Sobirov, Markaz Axborot-tahlil bo‘limi bosh mutaxassisi Abduraxman Muhamedovlar ishtirok etdi.

Dastlab uchrashuvda joriy yilning 24-noyabr sanasi “Diniy bag‘rikenglik xalq diplomatiyasining poydevori” mavzusi bo‘yicha o‘zaro hamkorlikda o‘tkazilishi rejalashtirilayotgan ilmiy-amaliy seminarni o‘tkazish bilan bog‘liq mazmuniy va tashkiliy masalalar muhokama qilindi.

Unda tadbirni yuqori saviyada tashkil etish, soha bo‘yicha ilmiy izlanish olib borgan va jarayonda faol ishtirok etayotgan mahalliy va xorijlik olimlar, mutaxassislar, yosh tadqiqotchilarni seminarga taklif qilish, tarjimon va ekspertlarni jalb etish, ilmiy-amaliy anjumanga kelib tushgan maqolalarni tahlil va tahrir qilib, soha vakillari foydalanishlari uchun to‘plam holida nashr etish, tashkiliy masalalarni puxta ishlab chiqish kabi jihatlar atroflicha ko‘rib chiqildi.

Shuningdek, konferensiyani mahalliy va xorijiy teleradiokanallar, internet saytlari, davriy matbuot nashrlari — gazeta va jurnallarda keng yoritish, ushbu nufuzli seminarni har yili an’anaviy tarzda o‘tkazib borish bo‘yicha taklif va tashabbuslar bildirildi.

Uchrashuv davomida hamkorlik aloqalarini kengaytirish, ilmiy-amaliy konferensiya va simpoziumlar tashkil etish, soha rivojida ilmiy izlanish olib borayotgan olimlar, yosh tadqiqotchilar uchun o‘zaro to‘plangan tajribalar, yangi taklif va tashabbuslarni o‘rtoqlashib borish maqsadida ilmiy maydon yaratib berish haqida suhbatlashildi.

O‘zbekiston xalqaro islom akademiyasi

Matbuot xizmati