Akademiyada JICA mutaxassisi Mori Yasuyukining faoliyati yakunlandi

Bugun Oʻzbekiston xalqaro islom akademiyasida Yaponiya xalqaro hamkorlik agentligi (JICA) Volontyorlar Dasturi doirasida Akademiya taʼlim jarayoniga jalb qilingan yaponiyalik mutaxassis Mori Yasuyuki bilan uchrashuv o‘tkazildi.

Uchrashuvda Oʻzbekiston xalqaro islom akademiyasi rektori Uyg‘un G‘afurov, “Zamonaviy axborot-kommunikatsiya texnologiyalari” kafedrasi mudiri Qurbon Rahmonov, kafedra oʻqituvchilari, Xorijiy talabalar bilan ishlash boʻlimi boshligʻi Navro‘zbek Abdullajonov, JICA tashkilotining Volontyorlar Dasturi koordinatori Odilxon Hasanov ishtirok etdi.

Muloqot davomida Oʻzbekiston xalqaro islom akademiyasi rektori Uyg‘un G‘afurov Akademiya taʼlim jarayonida Yaponiyaning rivojlangan tajribalari bilan tanishish imkoniyatini taqdim etgani uchun JICA Volontyorlar Dasturi mutaxassisi Mori Yasuyukiga oʻz tashakkurini bildirdi. 

O‘z navbatida Mori Yasuyuki oʻzining Akademiyada olib borgan faoliyati haqida to‘xtaldi. Mori Yasuyuki 2022-yil noyabr oyidan Akademiyada faoliyat yurita boshlagan. Ushbu davrda talabalarga super kompyuter taqdimoti, Yaponiya ijtimoiy tarmoqlariga kirish, superkompyuterda maqola yaratish, Yaponiyaning soʻnggi sunʼiy intellekti misoli loyihasi, Linux operatsion tizimi amaliy mashgʻuloti, Linux operatsion tizimida Hacker texnologiyasi namoyishi boʻyicha maʼruzalar o‘tkazdi. Sunʼiy intellekt dasturlash boʻyicha toʻgarak tashkil etdi. Oʻtilgan darslarni talabalar katta qiziqish bilan kuzatib bordi.

Mori Yasuyuki Oʻzbekiston xalqaro islom akademiyasi hamda JICA tashkiloti oʻrtasida hamkorlik aloqalarini mustahkam olib borilayotgani, shuningdek, volontyorlar uchun yetarli shart-sharoit yaratib berilayotgani va volontyorni har jabhada qoʻllab-quvvatlayotgani uchun Akademiya rahbariyatiga minnatdorchilik bildirdi. 

Shuningdek, Oʻzbekiston va Yaponiya oʻrtasidagi samarali hamkorliklar davom etishiga ishonch bildirdi.

Yakunda Mori Yasuyuki janoblariga Akademiya rahbariyati tomonidan esdalik sovg‘alari topshirilib, zarbof to‘n kiydirildi.

O‘zbekiston xalqaro islom akademiyasi

Matbuot xizmati