Akademiya vakillarining Malayziyadagi tashrifi davom etmoqda

Oʻzbekiston xalqaro islom akademiyasi dotsenti Durbek Rahimjonov, Imom Moturidiy xalqaro ilmiy-tadqiqot markazi direktori Jamoliddin Karimov, Imom Buxoriy xalqaro ilmiy-tadqiqot markazi direktori Shovosil Ziyodov, markaz xodimlaridan iborat yurtimiz delegatsiyasi  Malayziyada boʻlib turibdi.

Tashrif doirasida Malayziya islomni anglash institutida tomonlar oʻrtasida uchrashuv boʻlib oʻtdi. Uchrashuvda diniy-maʼrifiy sohada ikki tomonlama hamkorlik aloqalarini yanada rivojlantirish, jumladan, hamkorlikda konferensiya va seminarlar tashkil etish, dolzarb mavzularga bagʻishlangan ilmiy maqolalar chop etish, Movarounnahr zaminidan yetishib chiqqan buyuk mutafakkir allomalarning hayoti va boy ilmiy-maʼnaviy merosiga bagʻishlangan koʻrsatuv va eshittirishlar tayyorlash hamda ularning Malayziyadagi namoyishini amalga oshirish kabi bir qator muhim masalalar muhokama qilinib, kelishuvlarga erishildi. 

Eʼtiborlisi, muzokaralar davomida Malayziya islom sanʼati muzeyida Oʻzbekistonning qadimiy va boy tarixi, ziyorat turizmi imkoniyatlarini namoyish etuvchi koʻchma foto koʻrgazma tashkil etish masalalari muhokama qilindi.