Oʻzbekiston tajribasi eʼtirof etildi

Rossiya Federatsiyasining Moskva shahrida boʻlib oʻtayotgan “Yevroosiyoda Yaqin Sharq tadqiqotlari” mavzusidagi II xalqaro konferensiyasi Yevroosiyo sharqshunoslari oʻrtasidagi oʻzaro hamkorlikning yangi formatlari, yoʻnalishlarini izlash hamda sharqshunoslik sohasida xalqaro loyihalarni ishlab chiqish va rivojlantirish, qoʻshma tadqiqot hamda tajriba almashish dasturlarini ragʻbatlantirish maqsadida oʻtkazilmoqda. 

Xalqaro konferensiyada Oʻzbekiston xalqaro islom akademiyasi rektori Uygʻun Gʻafurov yurtimizda diniy-ma’rifiy sohaga berilayotgan e’tibor, sharqshunoslik, islomshunoslik borasida amalga oshirilayotgan o‘zgarishlar haqida ma’ruza qildi.

Anjuman davomida sharqshunoslik sohasida Oʻzbekiston tajribasiga xalqaro ilmiy jamoatchilik tomonidan yuqori baho berildi. Sharqshunoslik sohasida xalqaro standartlar darajasida oliy ma’lumotli mutaxassislarni tayyorlash, ajdodlarimiz qoldirgan ilmiy meroslarni tadqiq etishda yangi davr boshlangani e’tirof etildi.

Xalqaro konferensiya oʻz ishini davom ettirmoqda.