Targ‘ibot guruhi a’zolari uchun malaka oshirish o‘quvlari bo‘lib o’tdi

O‘zbekiston xalqaro islom akademiyasi huzuridagi Malaka oshirish markazida Farg‘ona, Andijon va Namangan viloyatlari Targ‘ibot guruhi a’zolari uchun “Aholi radikallashuvining oldini olishdagi dolzarb masalalar” yo‘nalishida 36 soatlik malaka oshirish o‘quvlari bo‘lib o‘tdi. Unda jami 20 nafar tinglovchi ishtirok etdi. 

Dars mashg‘ulotlari O‘zbekiston xalqaro islom akademiyasining tajribali professor-o‘qituvchilari, Din ishlari bo‘yicha qo‘mita qaytaruv guruhi a’zolari hamda sohaning yetuk mutaxassislari tomonidan olib borildi. Jumladan, Din ishlari bo‘yicha qo‘mita mas’ul xodimi A.Qambarov “Tasavvufiy tushunchalarni soxta tariqatlarda noto‘g‘ri aks etishi”, O‘zbekiston xalqaro islom akademiyasi professori, tarix fanlari doktori I.Bekmirzayev “Ilmiy munozarada mantiq qonun-qoidalaridan foydalanish metodikasi”, Akademiya dotsenti, psixologiya fanlari doktori X.Alimov tomonidan “Mutaassib guruhlar ta’siriga berilishning psixologik asoslari va ularni sog‘lom hayotga qaytarish usullari” kabi mavzularda dars mashg‘ulotlari bo‘lib o‘tdi. 

Dars mashg‘ulotlaridan so‘ng tinglovchilar uchun Toshkent shahar, Shayxontohur tumanida bo‘lib o‘tayotgan “Jaholatga qarshi ma’rifat” nomli tadbirlarda amaliy mashg‘ulotlar tashkil etildi.