Samarqandda malaka oshirish o‘quvlari tashkil etildi

Davlatimiz rahbarining joriy yil Samarqand viloyatiga tashrifi davomida berilgan topshiriqlari ijrosini ta’minlash maqsadida Imom Buxoriy xalqaro ilmiy-tadqiqot markazida “Aholi radikallashuvining oldini olishdagi dolzarb masalalar” yo‘nalishida malaka oshirish o‘quvlari tashkil etildi.

O‘zbekiston xalqaro islom akademiyasi huzuridagi Malaka oshirish markazi Samarqand mintaqaviy filiali tomonidan tashkil etilgan o‘quvlarda Samarqand viloyati faoliyat olib borayotgan 40 nafar iqtidorli imom-xatib va noiblar ishtirok etmoqda.

Mazkur o‘quvlardan ko‘zlangan maqsad, diniy soha xodimlari tomonidan aholi, ayniqsa, yoshlar va xotin-qizlar orasida radikallashuvning oldini olish, ularni turli yot g‘oyalar ta’siridan saqlash, adashgan toifalar ta’siriga tushgan shaxslarni to‘g‘ri yo‘lga qaytarish bo‘yicha bilim-ko‘nikmalarini yanada takomillashtirishdan iborat.