Soha rahbarlari yaratilgan sharoitlar bilan tanishib, ziyoratchilar bilan suhbatlashdi

Saudiya Arabistonida xizmat safarida bo‘lgan Prezident maslahatchisi Muzaffar Komilov, Din ishlari bo‘yicha qo‘mita raisi Sodiqjon Toshboyev Makka shahridagi “Roshidiya”, “Abroj Dana”, “Laba Darna” va “Ruba al-Hijaz” mehmonxonalaridagi yurtimiz ziyoratchilari uchun yaratilgan shart-sharoitlar bilan yaqindan tanishishdi.

Mutasaddilar tomonidan ziyoratchilarimizga taqdim etilayotgan zamonaviy imkoniyatlar, xonalar shinam va ozodaligi, oshxonalarning sanitariya-gigiyena talablariga javob berishi, oziq-ovqat mahsulotlarining sifati hamda vitaminga boyligi, tibbiy va transport xizmatlarining uzluksizligiga katta e’tibor qaratildi. Bu kabi qulayliklar bo‘lg‘usi hojilarimizning emin-erkin, ixlos-u imon bilan ibodat qilishlariga xizmat qilishi alohida ta’kidlandi.

Shuningdek, soha rahbarlari ibodat bilan mashg‘ul bo‘lib turgan hamyurtlarimiz bilan uchrashib, ularga ko‘rsatilayotgan xizmatlar hamda yaratib berilgan sharoitlar borasidagi fikr-mulohazalarini tingladi. Yurtdoshlarimiz o‘zaro muloqotlarda mavsumga har tomonlama puxta tayyorgarlik ko‘rilgani, barcha imkoniyatlar muhayyo qilinganini yakdil e’tirof etdilar. Qolaversa, ular haj ibodatlarini ado etish chog‘ida har qadamda davlatimizning mehr va e’tiborini, ko‘magini dildan his etayotganliklarini izhor etishdi.

Uchrashuvda Prezident maslahatchisi tomonidan ishchi guruhi, ellikboshilar va shifokorlar jamoasiga o‘z yo‘nalishlari bo‘yicha muhim topshiriq va tavsiyalar berildi. Ziyoratchilar ibodatlarini bekamu ko‘st ado etishlari uchun barcha shart-sharoitlarni hozirlash muhimligini ta’kidladi.

Darhaqiqat, bu kabi savobli ishlar zamirida inson qadrini ulug‘lash kabi ezgu maqsadlar mujassam. Bunday yuksak e’tiborni bo‘lajak hojilarimiz Madinai munavvarada ham, Makkai mukarramada ham his qilishmoqda.

Manba:

O‘zbekiston musulmonlari idorasi Matbuot xizmati