Akademiyada tadbirlar shukuhi davom etmoqda

O‘zbekiston xalqaro islom akademiyasida bir guruh xodimlarni “Oʻzbekiston Konstitutsiyasining 30 yilligi” esdalik nishoni bilan taqdirlash hamda Oʻzbekiston Respublikasi Davlat madhiyasi qabul qilinganining 30 yilligi munosabati bilan tadbir bo‘lib o‘tdi.

Marosimda O‘zbekiston Respublikasi Prezidentining jamoat va diniy tashkilotlar bilan hamkorlik masalalari bo‘yicha maslahatchisi, O‘zbekiston xalqaro islom akademiyasi rektori Muzaffar Komilov, Vazirlar Mahkamasi huzuridagi Din ishlari bo‘yicha qo‘mita raisi Sodiq Toshboyev, Din ishlari bo‘yicha qo‘mita xodimlari, Akademiya prorektorlari, professor-o‘qituvchilar, xodimlar hamda talabalar ishtirok etdi. 

Tadbir avvalida Oʻzbekiston Respublikasining Davlat madhiyasi ijro etildi. Shundan so‘ng Akademiya rektori yig‘ilganlarni qo‘shaloq bayram bilan yana bir bor bayram bilan muborakbod etdi. Madhiyamiz milliy oʻzlikni anglash, xalqimizni yorugʻ kelajakka boshlash, yurtdoshlarimiz qalbida ona Vatanga muhabbat, istiqlol gʻoyalariga sadoqat tuygʻularini mustahkamlash kabi ezgu maqsadlarga xizmat qilayotganini alohida e’tirof etdi.

Mamlakatimiz mustaqilligini mustahkamlash, uning iqtisodiy, siyosiy, ijtimoiy, ilmiy, maʼnaviy salohiyatini yuksaltirish, tinchlik va barqarorlik, millatlararo doʻstlik va totuvlikni asrash, Yangi Oʻzbekistonda demokratik islohotlarni chuqurlashtirish, yosh avlodni qonunga hurmat, Vatanga mehr va sadoqat ruhida tarbiyalash ishlariga munosib hissa qoʻshib kelayotgan Akademiyaning bir guruh xodimlariga “Oʻzbekiston Konstitutsiyasining 30 yilligi” esdalik nishoni topshirildi.

Shu bilan birga, Akademiyadagi fidokorona mehnati, yoshlarni har tomonlama yetuk qilib tarbiyalashdagi hissasi uchun bir guruh Akademiya xodimlari hamda talabalari tashakkurnoma bilan taqdirlandi. Akademiya kasaba uyushmasi tomonidan ham esdalik sovg‘alari topshirildi. 

Bundan tashqari, tadbir davomida Akademiyaning “Din psixologiyasi va pedagogika” kafedrasi o‘qituvchisi Azamat Nazarovga psixologiya fanlari bo‘yicha falsafa doktori guvohnoma topshirildi.

O‘zbekiston xalqaro islom akademiyasi

Matbuot xizmati