Yoshlar – kelajak bunyodkori

Mamlakatimizda yoshlar siyosatiga davlat darajasida e’tibor qaratilmoqda. O‘g‘il-qizlarni vatanparvarlik, milliy an’ana va qadriyatlarimizga hurmat ruhida tarbiyalash, ma’naviy yetuk va jismonan sog‘lom barkamol avlodni voyaga yetkazish borasida qator ishlar amalga oshirilmoqda.

Ayniqsa, oliy ta’lim muassasalarini bitirayotgan yigit-qizlarning mutaxassisligi bo‘yicha ish bilan ta’minlash masalasi hamon eng dolzarb vazifa bo‘lib qolmoqda. Bugungi kunda yoshlar uchun yangi ish o‘rinlari ochish, ularning halol mehnat qilib, daromad topishi uchun tizimli ishlar bosqichma-bosqich yo‘lga qo‘yilmoqda.

O‘zbekiston xalqaro islom akademiyasida “Yoshlar – kelajak bunyodkori” mavzusida davra suhbati o‘tkazildi. Mazkur tadbir Akademiya talabalarining malakaviy amaliyoti samaradorligini oshirish hamda bitiruvchilarni o‘z vaqtida ish bilan ta’minlanishiga ko‘maklashish maqsadida tashkil etildi.

Unda O‘zbekiston xalqaro islom akademiyasi O‘quv ishlari bo‘yicha prorektori Ibrohim Usmonov, O‘zbekiston Respublikasi Ichki ishlar vazirligi Probatsiya xizmati bo‘lim boshlig‘i, polkovnik Baxtiyor Parmanov, Ichki ishlar vazirligi Probatsiya xizmati bosh inspektori, psixolog, kapitan Olmos Mustanov, Ichki ishlar vazirligi Probatsiya xizmati bosh inspektori Vahobjon Fayziyev, Akademiya professor-o‘qituvchilari hamda “Mumtoz sharq filologiyasi” fakulteti “Psixologiya (din sotsiopsixologiyasi)” bakalavriat ta’lim yo‘nalishining yuqori bosqich talabalari ishtirok etdi. 

Davra suhbatida so‘zga chiqqanlar yoshlar bandligini ta’minlash masalasi dolzarb vazifa ekanligini ta’kidlashdi. Bugungi kunda yoshlar zimmasida turgan eng muhim vazifa bilim olish ekanligi, o‘g‘il-qizlar o‘tayotgan har bir daqiqadan foydalanish lozimligini qayd etishdi. Tadbir davomida shuningdek Ichki ishlar vazirligi jazoni ijro etish bosh boshqarmasi huzurida tashkil etilgan probatsiya xizmati haqida ma’lumot berishdi.

Uchrashuv yakunida talabalar o‘zlarini qiziqtirgan savollar bilan mutasaddilarga murojaat qilishdi. Yakunda mazmunli uchrashuv uchun minnatdorlik bildirilib, mehmonlarga esdalik sovg‘alari topshirildi.

O‘zbekiston xalqaro islom akademiyasi 

Matbuot xizmati