Yangi o‘quv yili oldidan Akademiya Kengashi majlisida muhim masalalar muhokama qilindi

Bugun O‘zbekiston xalqaro islomshunoslik akademiyasida Akademiya kengashining yig‘ilishi bo‘lib o‘tdi. Unda O‘zbekiston Respublikasi Prezidentining vakillik organlari, nodavlat notijorat tashkilotlar, din va yoshlar masalalari bo‘yicha maslahatchisi o‘rinbosari, O‘zbekiston xalqaro islomshunoslik akademiyasi rektori, Kengash raisi Muzaffar Kamilov, Akademiya rahbariyati, Kengash a’zolari, professor-o‘qituvchilar hamda xodimlar ishtirok etishdi.

Majlisni Akademiya rektori, Kengash raisi Muzaffar Kamilov olib bordi.

Akademiya rektori barchani yaqinlashib kelayotgan O‘zbekiston Respublikasi mustaqilligining 34 yilligi bilan tabriklab, eng ulug‘ va eng aziz bayramni ko‘tarinki kayfiyatda kutib olishlarini tiladi. 

Kengash avvalida bir guruh o‘qituvchilarga ilmiy unvon va diplomlarni topshirish marosimi o‘tkazildi.

Jumladan, Javohirxon Sobirovga siyosiy fanlar bo‘yicha falsafa doktori PhD ilmiy darajasi; 

“Arab tili va adabiyoti al-Azhar” kafedrasi dotsenti Yorqin Shukurovga “Pedagogika tarixi. Pedagogik ta’limotlar nazariyasi” ixtisosligi bo'yicha dotsent ilmiy unvoni;

“Arab tili va adabiyoti al-Azhar” kafedrasi dotsenti Madinabonu Kadirovaga “Pedagogika nazariyasi. Pedagogik ta'limotlar tarixi” ixtisosligi bo‘yicha dotsent ilmiy unvoni;

“Islomshunoslik va islom sivilizatsiyasini o‘rganish ICESCO” kafedrasi dotsenti Nigora Xakimovaga “Fiqh, kalom ilmi. Ilohiyot” ixtisosligi bo‘yicha dotsent ilmiy unvoni;

“Islomshunoslik va islom sivilizatsiyasini o‘rganish ICESCO” kafedrasi dotsenti Nilufar Tuychiyevaga esa “Islom tarixi va manbashunosligi” ixtisosligi bo‘yicha dotsent ilmiy unvoni diplomlari topshirildi. Ularning kelgusidagi ilmiy faoliyatlariga muvaffaqiyat tilandi. 

Shundan so‘ng Akademiya rektori Muzaffar Kamilov O‘zbekiston xalqaro islomshunoslik akademiyasida 2025/2026-o‘quv yilini tashkil etish bo‘yicha amalga oshirilayotgan ishlar va Akademiya oldida turgan dolzarb vazifalar to‘g‘risida so‘z yuritdi.

Davlatimiz rahbari tomonidan Akademiya zimmasiga katta vazifalar qo‘yilayotgani, yoshlarni ilm-ma’rifatli etib tarbiyalashda muhim muassasa bo‘lishi kerakligi, yoshlarni sifatli ta’lim bilan ta’minlash ustuvor maqsad ekani ta’kidlandi. Barcha mas’ul mutasaddilar yoshlar bilan ishlash tizimini yanada shakllantirish uchun “Strategik yo‘nalish” tuzishi zarurligi qayd etildi. “Har bir talabaning taqdiri biz uchun muhim” dedi Akademiya rektori.

Zero, davlatimiz rahbari mustaqilligimizning 34 yillik bayrami tantanalaridagi nutqlarida aytganlaridek, “Intiluvchan, iste’dodli yoshlar – Yangi O‘zbekistonning oltin avlodi, g‘ururimiz timsolidir”.

Akademiya rektori o‘z so‘zida davom etar ekan, ilmiy salohiyatni yanada kuchaytirish kechiktirib bo‘lmas vazifa ekanini alohida ta’kidladi.

Professor-o‘qituvchilar va xodimlar hamda talabalar orasida kitobxonlik madaniyatini oshirish kerakligi qayd etildi.

Majlis davomida Akademiya Kengashining 2025/2026-o‘quv yili ish rejalari loyihasi, O‘zbekiston Respublikasi Oliy ta’lim, fan va innovatsiyalar vazirligi huzuridagi OAKga ilmiy unvon olish uchun tavsiya etish hamda O‘zbekiston xalqaro islomshunoslik akademiyasining 2025/2026-o‘quv yilida talabalarga grantlarni taqdim etish va qayta taqsimlash bo‘yicha maxsus komissiya qarorini tasdiqlash to‘g‘risida Kengash kotibi Jaloliddin Bo‘riyevning hisoboti tinglandi. 

Shuningdek, 2025/2026-o‘quv yilida kadrlar tayyorlash va ularga zamon talabi darajasidagi shart-sharoitlarni yaratish, ta’lim-tarbiya va ilmiy-tadqiqot, xalqaro faoliyat sifatini oshirishga mo‘ljallangan o‘quv yili ish rejalari loyihasi muhokamasi bo‘yicha soha prorektorlari, fakultet dekanlari tomonidan ma’lumot berildi.

2025/2026-o‘quv yili uchun fan dasturlari, o‘quv rejalari va meyoriy hujjatlarni zamon talablari hamda akademik ta’limga mos ravishda bakalavriat ta’lim yo‘nalishlari va magistratura mutaxassisliklari uchun malaka talablariga muvofiq holda ishlab chiqilganlik holati to‘g‘risida O‘quv ishlari bo‘yicha prorektor Zokirjon Ro‘ziyev so‘z yuritdi. 

Akademik litsey ijrochi direktori Feruz Rashidov tomonidan Oʻzbekiston xalqaro islomshunoslik akademiyasi akademik litseyi iqtidorli oʻquvchilarini “Rektor stipendiyasi”ga tavsiya etish toʻg‘risidagi hisoboti tinglandi. 

Kengashda sohadagi shu kabi yutuqlar e’tirof etilgan holda, diniy-ma’rifiy sohada bajarilishi zarur bo‘lgan galdagi vazifalar va mavjud muammolar ham tahlil qilindi.

Xususan, iqtidorli talabalar bilan ishlash borasida yangicha mexanizm yaratish, yoshlar uchun Akademiyada shart-sharoitlar yaratish kerakligi qayd etildi. 

Yig‘ilish yakunida muhim vazifalar belgilab olindi. 

O‘zbekiston xalqaro islomshunoslik akademiyasi

Matbuot xizmati