Vatan qolar ekan, Vatan abadiy!

Kechagina “Yangi O‘zbekiston” bog‘ida O‘zbekiston Respublikasi mustaqilligining 34 yillik shodiyonasiga bag‘ishlangan tantanali tadbirda Prezidentimiz Shavkat Mirziyoyevning nutqlarini televidenie orqali zo‘r hayajon bilan kuzatdik. 

Keyingi yillarda mamlakatimizda “Inson qadri uchun” ezgu g‘oyasi asosida amalga oshirilgan islohotlar ko‘lami va qamrovi davlat rahbari ma’ruzasini tinglagan har bir insonni hayratlantirishi tabiiy. 

2016-yildan boshlangan va bugun milliy va xalqaro darajada e’tirof etilayotgan yangi O‘zbekiston islohotlarining mazmunida umuminsoniy qadriyatlar qatorida tan olingan eng ezgu g‘oyalar: vatan uchun, millat uchun, xalq uchun – har bir insonning millati, tili, dini, e’tiqodi, ijtimoiy maqomidan qat’i nazar dil tubidagi go‘zal orzularining ro‘yobi uchun amalga oshirilgan tarixiy o‘zgarishlar, taraqqiyot natijalari, siyosiy, ijtimoiy, iqtisodiy va ma’naviy sohadagi yuksalishlar mujassam. 

Mamlakatimizning yalpi ichki mahsuloti hajmi 110 milliard dollardan oshgani, 130 milliard dollarlik xorijiy investitsiya jalb qilingani, oltin-valyuta zaxiralarimiz 48 milliard dollardan ortgani, kambag‘allik darajasi 35 foizdan 6,8 foizga tushgani, kichik va o‘rta tadbirkorlar soni 10 milliondan ko‘paygani, 12 mingta qo‘p qavatli uy qurilib, xalqimiz ixtiyoriga topshirilgani haqida biroz tafakkur qilinsa, amalga oshirilgan ishlar ortida ulkan mehnat, mislsiz g‘ayrat va shijoat turganini anglash mumkin. 

Davlatimiz rahbari bu yutuqlarni sanab o‘tar ekan, bu so‘nggi marra emasligini, balki yil oxirigacha bundan-da yuksak natija bizni kutayotganini alohida ta’kidladi: “Raqamlarga e’tibor beraylik: keyingi sakkiz yilda yalpi ichki mahsulotimiz 2 karra oshib, o‘tgan yili 115 milliard dollarga, eksport hajmi 26 milliard dollarga yetdi. Yil yakuni bilan yalpi ichki mahsulotimiz 130 milliard dollar bo‘ladi”. 

Aholisi 38 milliondan oshgan ko‘p millatli O‘zbekistonda bunday yutuqlarga erishish oson emasligi, buning uchun o‘n yillarni ko‘zlagan, chuqur o‘ylangan strategiya, harakatlarning aniq rejasi va to‘xtovsiz ilgari harakatlanadigan tizim kerakligi ma’lum haqiqat. Prezidentimiz mazkur muammo yechimi borasida qilingan ishlar haqida to‘xtalib: “Yurtimiz aholisi yiliga o‘rtacha 700-800 ming kishiga ko‘paymoqda. Mehnat bozoriga har yili 500-600 ming nafar yoshlar kirib kelmoqda. Buncha odamni o‘qitish, kasb-hunarli qilish, ularga ish topib berish o‘z-o‘zidan bo‘lmaydi, albatta. Buning uchun muntazam ishlaydigan tizim, kafolatli investitsiya va infratuzilma kerak. 

Shuni oldindan chuqur o‘ylab, biz bu yo‘nalishda aniq dasturlarni qabul qildik. Biz mahallagacha tushib, o‘zini o‘zi band qilgan tadbirkordan tortib, yirik biznesgacha – barchasini alohida yondashuv asosida qo‘llab-quvvatlash bo‘yicha tizim barpo etdik”, deya ta’kidladilar. 

Bugun mahallabay ishlash tizimi o‘z natijalarini ko‘rsatayotganiga mamlakatimizdagi 9452 mahalla fuqarolari yig‘inida mahalla raisi, hokimning tadbirkorlik masalalarini hal etish bo‘yicha yordamchisi, xotin-qizlar faoli, yoshlar yetakchisi, profilaktika inspektori, ijtimoiy xodim va soliq inspektoridan iborat yettilik faoliyat ko‘rsatayotgani, ularning xizmat vazifalari huquqiy jihatdan aniq belgilangani o‘z natijasini bermoqda. 

O‘zbekiston mahallalari uyushmasi tizimida 100 mingga yaqin xodim xalqimiz ravnaqi yo‘lida mehnat qilmoqda. Bu, albatta, Yangi O‘zbekiston erishgan har bir insonning kafolatli tinch va xotirjam hayotini ta’minlash, turmushi farovonligini kun sayin yuksaltirish yo‘lidagi yutuqlaridan biri. Prezidentimiz ta’kidlaganlaridek: “Biz yurtimizda ijtimoiy himoya siyosatining butunlay yangi modelini yaratdik. Bu tizim xonadonlargacha kirib borgani, ehtiyojmand aholi bilan individual ishlashni yo‘lga qo‘yganimiz, “Inson” markazlarini tashkil etganimiz – barcha uchun teng imkoniyat yaratilgan inklyuziv jamiyatni shakllantirishga xizmat qilmoqda. Hammamiz bir haqiqatni tushunib olishimiz kerak: yurtimizda begona odam ham, begona bola ham yo‘q. Barchamiz yagona yurt farzandlarimiz, yagona Vatan ravnaqiga xizmat qilamiz. Shu ma’noda, bitta bo‘lsa ham qiyin ahvolga tushib qolgan hamurtimiz taqdiri barchamizni birdek tashvishga solishi kerak. Chunki xalqimizning eng katta qudrati – mehr-oqibat, saxovat va birdamlikdadir”.

Prezidentimiz har bir nutqlarida ta’lim-tarbiya masalasiga alohida e’tibor qaratadilar. Bu safar ham an’ana davom etdi. Davlatimiz rahbari ta’limning barcha shakllarida erishilgan natijalarni alohida qayd etdilar: so‘nggi sakkiz yilda maktabgacha ta’lim 78 foizga yetgani, maktab ta’limida 1 million o‘quvchi sharoitlar yaratilgani va oliy ta’limdagi qamrov 9 foizdan 42 foizga yetgani Buxoro, Navoiy va Jizzax shaharlaridagi uchta maktab bitiruvchilarining 100 foizi oliy ta’limda o‘qishni davom ettirayotgani “Yangi O‘zbekiston maktab ostonasidan boshlanadi” degan ezgu g‘oyaning hayotiy ifodasidir. 

Ushbu natijalar biz kabi ta’lim sohasida faoliyat olib borayotgan professor-o‘qituvchi va murabbiylar uchun ham yuksak faxr-iftixor bag‘ishlaydi. Prezidentimizning har bir so‘zlarida erishilgan natijalar bilan to‘xtab qolmay, balki yangi marralar sari ezgu da’vat mujassam: “Barcha ta’lim dargohlariga Uchinchi Renessans nafasi yanada kuchliroq kirib boradi”. 

Bu zalvorli so‘zlar bugun ta’limning qaysi bo‘g‘ini, qaysi sohasida bo‘lmasin faoliyat olib borayotgan o‘qituvchidan tortib, mutasaddi rahbar zimmasiga ulkan vazifa yuklaydi. Biz shiddat bilan rivojlanayotgan Yangi O‘zbekiston bag‘rida hayot kechirar ekanmiz, Uchinchi Renessans nafasini his qilishga, bu oliy marra sari intilishga o‘sib kelayotgan yosh avlodni ham targ‘ib etishga mas’ulmiz. Bu borada Prezidentimizning Mustaqillik bayrami tabrigida yoshlarga murojaat qilib aytgan quyidagi so‘zlari dasturi amal bo‘lishi zarur: “Aziz farzandlarim, doimo yodda tuting: baxt – intilganniki, g‘alaba – kurashganniki!

Kelajakni mardlar, tarixni g‘oliblar yaratadi. 

Hamisha oldinga qarab intiling, bahodir o‘g‘lonlarim, oqila qizlarim! 

Sizlarning ezgu ishlaringizda Vatan, xalq, Prezident barchangizga hamisha ishonchli tayanch va suyanch bo‘ladi”. 

Bayram ishtirokchilari bo‘lgan O‘zbekiston yoshlarining vakillari tomonidan uzoq va davomli olqishlar bilan kutib olingan mazkur o‘tkir ma’noli so‘zlarni hayotga tatbiq qilishda, farzandlarimizni saodatli istiqbol sari intiladigan, bu yo‘ldagi qiyinchiliklarni mardonavor kurashlar bilan yengib o‘tadigan, tarixiy g‘alabalar, olamshumul zafarlar sohibi etib tarbiyalash har bir ota-ona, murabbiy va ustozning sharafli burchidir. 

Saidafzal Saidjalolov,

O‘zbekiston xalqaro islomshunoslik akademiyasi dotsenti,

tarix fanlari bo‘yicha falsafa doktori