“Dolzarb 90 kun” doirasida o‘quvchilar uchun to‘garaklar va sport musobaqalari tashkil etildi

Bugun O‘zbekiston xalqaro islomshunoslik akademiyasida Shayxontohur tumanidagi mahalla fuqarolar yig‘inlari yoshlari uchun “Yoshlar – Uchinchi Renessans poydevori” shiori ostida madaniy-ma’rifiy va sport tadbirlari o‘tkazildi.

Mazkur bellashuvlar davlatimiz rahbari tashabbusi bilan amalga oshirilayotgan “Dolzarb 90 kun” tadbirlari doirasida yoshlarni ma’naviy-axloqiy jihatdan tarbiyalash, sog‘lom turmush tarzini targ‘ib etish hamda ularning bo‘sh vaqtini mazmunli o‘tkazish maqsadida tashkil etildi. 

Jumladan, Akademiya professor-o‘qituvchilari va mutaxassislari tomonidan maktab o‘quvchilari bilan foydali suhbatlar, ma’naviyat darslari hamda turli to‘garaklar tashkil etilmoqda. Bu to‘garaklarda bolalar ma’naviy-ma’rifiy, yuksak axloq, oilaviy qadriyatlar, sog‘lom hayot tarzi kabi mavzularda bilim va ko‘nikmalarga ega bo‘lishdi.

Shuningdek, yoshlarni jismonan chiniqtirish maqsadida futbol, voleybol, stol tennisi, shaxmat-shashka va kibersport kabi musobaqalar ham o‘tkazilib, g‘olib va faol ishtirokchilar esdalik sovg‘alari va diplomlar bilan taqdirlanmoqda. 

Mazkur tadbirlar orqali o‘quvchilarning ma’naviy-ma’rifiy dunyoqarashi yanada boyib, vatanparvarlik va sog‘lom turmush tarziga bo‘lgan munosabati mustahkamlandi.