Abu Ali ibn Sino: “Badantarbiya – sog‘liqni saqlashda ulug‘vor usuldir”

Keyingi yillarda yurtimizda aholi orasida ommaviy sportni rivojlantirish, sog‘lom turmush tarzini targ‘ib qilish, sport bilan shug‘ullanishlari uchun keng imkoniyatlar yaratib berishga alohida e’tibor qaratilmoqda.

Xususan, joriy yilning 13-fevral kuni O‘zbekiston Respublikasi Prezidenti, Milliy Olimpiya qo‘mitasi raisi Shavkat Mirziyoyev boshchiligida olimpiya va paralimpiya harakati, ixtisoslashtirilgan va ommaviy sportni yangi bosqichga olib chiqish hamda aholi jismoniy faolligini oshirish chora-tadbirlari bo‘yicha videoselektor yig‘ilishi o‘tkazilgan edi.

Mazkur yig‘ilishda davlatimiz rahbari tomonidan “Sog‘lom inson – sog‘lom millat” g‘oyasi umummilliy harakatga aylantirilishi ta’kidlanib, buning uchun sog‘lom ovqatlanish va jismoniy faollik targ‘ibotini har bir oilaga olib kirish kerakligi aytilgan edi.

Shu maqsadda Oʻzbekiston xalqaro islom akademiyasida haftaning har shanba kuni Akademiya rahbariyati boshchiligida ertalabki badantarbiya mashg‘ulotlari yuqori kayfiyat va uyushqoqlik bilan o‘tkazilmoqda.

Xususan, bugungi sog‘lomlashtirish mashg‘ulotlarida professor-o‘qituvchilar, xodimlar hamda talabalar faol ishtirok etdilar.

Mashg‘ulotlar Akademiyaning Mirzo Ulug‘bek tumanida joylashgan 2-Talabalar turar joyida ham bo‘lib o‘tdi.

Badantarbiya mashqlaridan so‘ng ishtirokchilar Akademiya sport zalida stol tennis va voleybol bahslarida bellashishdi. 

Akademiya rahbariyati, professor-o‘qituvchilar, xodimlar hamda talabalar mashg‘ulotlar davomida o‘z salomatliklarini chiniqtirib olishdi.