Kiberjinoyatchilar o‘ljasiga aylanmang!

Keyingi vaqtlarda axborot texnologiyalarining keng miqyosda rivojlanishi bir vaqtning o‘zida ko‘p turdagi kiberjinoyatlar sodir etilishiga imkon yaratmoqda. Bu, o‘z navbatida, ushbu turdagi jinoyatlarni aniqlash va ular oldini olishda yuqori bilim va kasbiy tayyorgarlikni talab qilayotir.

Yoshlarga kiberjinoyatlarga qarshi kurashishda tushunchalar berish, axborot texnologiyalari sohasidagi jinoyatlardan ogoh etish maqsadida bugun O‘zbekiston xalqaro islom akademiyasida Toshkent shahar Ichki ishlar bosh boshqarmasi bilan hamkorlikda “Kiberjinoyatchilar o‘ljasiga aylanmang!” mavzusida davra suhbati o‘tkazildi.

“Zamonaviy axborot-kommunikatsiya texnologiyalari” kafedrasi tomonidan tashkil etilgan tadbirda Islom iqtisodiyoti va xalqaro munosabatlar fakulteti dekani Farhod Karimov hamda Shayxontohur tumani IIBB vakili Shahzod Islomov mavzu yuzasidan ma’ruza qildilar.

Davra suhbatida kafedra mudiri Qurbon Rahmonov, kafedra professor-o‘qituvchilari hamda talabalar ishtirok etdi.

Tadbirda so‘zga chiqqanlar tomonidan keyingi yillarda axborot texnologiyalari sohasidagi jinoyatlar orasida internet firibgarligi avj olgani qayd etildi. So‘nggi vaqtlarda zamonaviy gadjetlar, interaktiv xizmatlardan foydalanishda qiyinchilikka duch keladigan sodda insonlarga kiberfiribgarlar tomonidan turli qo‘ng‘iroqlar bo‘layotgani, fuqarolardan aldov yo‘llari bilan uning shaxsiy ma’lumotlarini olib, plastik kartalaridagi pullari yechib olinayotgani yoki fuqaro xabarisiz bank kreditlarini rasmiylashtirish avj olgani ta’kidlandi.

Buning oldini olish maqsadida kiberjinoyatlarga qarshi kurashuvchi mutaxassislar tomonidan joylarda targ‘ibot-tashviqot ishlarini yanada kuchaytirish zarurligi qayd etilib, talabalarga zarur tavsiyalar berildi.          

Begonalarga shaxsiy ma’lumotlarni bermaslik, gadjetlarga xavfsizlikka javob beradigan parollar o‘rnatish, shubhali telefon raqamlarini ko‘tarmaslik, begona inson bilan muloqot qilmaslik kerakligi ta’kidlandi.

Yakunda talabalar o‘zlarini qiziqtirgan savollar bilan murojaat qilishdi.