Akademiyada dolzarb mavzuda davra suhbati o‘tkazildi

Barkamol avlodni voyaga yetkazish, unib-o‘sib kelayotgan yoshlarga doimiy g‘amxo‘rlik qilish davlatimiz rahbari boshchiligida amalga oshirilayotgan siyosatning eng muhim va ustuvor yo‘nalishlaridan biridir. 

Yurtimiz yoshlari bugungi kunda nafaqat respublika, balki dunyo miqyosida o‘zining aql-zakovati, shijoati, intellektual salohiyati, kelajakka intiluvchanligi bilan e’tibor qozonmoqda. Prezidentimizning yoshlar kamolotiga qaratayotgan doimiy e’tibori, ayniqsa, ta’lim islohotlarida yaqqol ko‘zga tashlanmoqda. 

Taassufki, amalga oshirilayotgan ijobiy ishlarga qaramasdan so‘ngi vaqtlarda yoshlar o‘rtasida sodir etilayotgan tan jarohati yetkazish va bezorilik jinoyatlar salmog‘i sezilarli darajada yuqoriligicha qolmoqda. 

Yoshlar orasida tan jarohati va bezorilik jinoyatlarni sodir etilishi – bugungi kunning dolzarb muammolaridan biriga aylanib bormoqda.

Buning oldini olish, ertamiz egalari o‘rtasida ma’rifatli jamiyat tamoyilini targ‘ib qilish maqsadida bugun O‘zbekiston xalqaro islom akademiyasida “Yoshlar oʻrtasida bezorilik hamda hayot va sogʻliqqa qarshi jinoyatlarning oldini olish” mavzusida davra suhbati bo‘lib o‘tdi.

Unda O‘zbekiston xalqaro islom akademiyasi O‘quv ishlari bo‘yicha prorektori Zokirjon Ro‘ziyev, O‘zbekiston Respublikasi Ichki ishlar vazirligi akademiyasi magistratura tinglovchisi, IIB departamenti bo‘lim boshlig‘i, podpolkovnik Hamidulla Aysakov, Akademiya professor-o‘qituvchilari, fakultet dekanlari hamda talabalar ishtirok etdi.

Davra suhbatida ma’ruzachi tomonidan yoshlar o‘rtasida sodir etilayotgan jinoyatlar, ularning ayanchli oqibatlari haqida ma’lumotlar berildi.

Oliy ta’lim muassasa rahbariyati, professor-o‘qituvchilari va mas’ullar ta’lim olayotgan yoshlar tomonidan o‘tkir tig‘li jismlar olib yurish, turli xil nizolar oqibatida bir-birlariga tan jarohati va bezorilik jinoyatlarini sodir etilishining huquqiy oqibatlarini tushuntirish zarurligi qayd etildi. 

Ertamiz egalarini vatanparvarlik, fuqarolik tuyg‘usi, bag‘rikenglik, qonunlarga, milliy va umuminsoniy qadriyatlarga hurmat ruhida, zararli ta’sirlar va oqimlarga qarshi tura oladigan, hayotga bo‘lgan qat’iy ishonch va qarashlarga ega shaxs sifatida tarbiyalash kerakligi ta’kidlandi. 

Yoshlarda sog‘lom turmush tarziga intilishni shakllantirish, shuningdek, yoshlarning bo‘sh vaqtlarini mazmunli tashkil etish va yoshlar sportini ommaviy rivojlantirish uchun shart-sharoitlar yaratish muhimli haqida so‘z yuritidi.

O‘zbekiston xalqaro islom akademiyasi

Matbuot xizmati