Islom akademiyasida IIV Akademiyasi magistrlari uchun sayyor mashg‘ulotlar o‘tkazildi

Bugun O‘zbekiston xalqaro islom akademiyasida Ichki ishlar vazirligi Akademiyasi magistratura “tashkiliy-taktik boshqaruv” mutaxassisligining tinglovchilari uchun sayyor mashg‘ulotlar bo‘lib o‘tdi.

Mazkur o‘quvlarni tashkil etishdan maqsad magistraturada ta’lim jarayonini nazariyaning amaliyot bilan uyg‘unligida tashkil etish, davlat hokimiyati va boshqaruvi organlari, shuningdek, nufuzli oliy ta’lim muassasalarida amalga oshirilayotgan islohotlarning mazmun-mohiyati bilan tinglovchilarni yaqindan tanishtirib borish ko‘zda tutilgan.

Ushbu o‘quvlar O‘zbekiston xalqaro islom akademiyasi hamda IIV Akademiyasi o‘rtasida 2024-yil 27-dekabr kuni imzolangan memorandumga asosan o‘tkazildi.

Mashg‘ulotlarni O‘zbekiston xalqaro islom akademiyasi rektori Muzaffar Komilov ochib berar ekan, bu kabi o‘quvlarni tashkil etishdan maqsad mazkur sohadagi faoliyatni yanada rivojlantirish, tizimda ishni to‘g‘ri va samarali tashkil etish, har tomonlama yetuk rahbar kadrlarni tayyorlash ekanini ta’kidladi.

Bir kunga mo‘ljallangan o‘quvlar davomida Akademiya professor-o‘qituvchilari tomonidan “Mutaassib guruhlar ta’siriga tushgan shaxslarni reabilitatsiya qilish va ularning dunyoqarashini ijobiy tomonga o‘zgartirish usullari” hamda “Sof islomiy tushunchalarning g‘arazli maqsadlarda noto‘g‘ri talqin qilinishi” kabi mavzularda ma’ruzalar tinglandi.

Eslatib o‘tamiz, O‘zbekiston Respublikasi Prezidentining 2021-yil 15-apreldagi qaroriga asosan, IIV Akademiyada tashkil etilgan I darajadagi “tashkiliy-strategik boshqaruv” va II darajadagi “tashkiliy-taktik boshqaruv” mutaxassislari bo‘yicha zamonaviy rahbar kadrlar tayyorlanmoqda.

Ushbu o‘quvlarda to‘plangan tajribalar ichki ishlar organlari uchun mutaxassislar tayyorlashning mutlaqo yangi tizimini joriy etib, xodimlarning malakasiga qarab xizmat bo‘yicha o‘sishini ta’minlashga, shuningdek, kuch va vositalarni samarali boshqarishda rahbar kadrlarning intellektual va professional salohiyatini oshirishga xizmat qilishi qayd etildi.

O‘quvlardan so‘ng Akademiya hududida joylashgan muqaddas qadamjolar – Shayx Xovandi Tohur, To‘labek (Qaldirg‘ochbek), Yunusxon maqbaralariga ziyorat tashkil etildi. Akademiyadagi o‘quv jarayonlari, ish faoliyati haqida ma'lumot berildi.

Shuningdek, mehmonlar “Manbalar xazinasi” bo‘limida ham bo‘lib, u yerda saqlanayotgan islom diniga oid nodir qo‘lyozma va toshbosma asarlar, “Usmon Mus’hafi” hamda “Langar Qur’oni”ning nusxalari bilan tanishdilar.