Akademiyada bayram shukuhi

Shu kunlarda mamlakatimizda Yangi yil shukuhi kezib yuribdi. Yurtimiz bo‘ylab o‘tkazilayotgan bayram tadbirlari, insonga o‘zgacha iliqlik bag‘ishlaydigan konsert dasturlari, bolalarning quvnoq kayfiyati bayramona muhit, tinchlik-totuvlikdan darak beradi.

Ushbu bayram oila a’zolarimiz, yaqinlarimiz davrasida to‘kin dasturxon atrofida nishonlanadi. Hamma bir-biriga ezgu tilaklar bildirib, sovg‘alar ulashadi. O‘tayotgan yildan xulosalar chiqarib, kirib kelayotgan yilga yangi rejalar, maqsadlar tuziladi. 

Shu maqsadda bugun O‘zbekiston xalqaro islom akademiyasida ham bayram munosabati bilan professor-o‘qituvchilar va xodimlarning farzandlari uchun “Yangi yil sarguzashtlari” nomli tadbir o‘tkazildi.

Bayram tadbirini O‘zbekiston xalqaro islom akademiyasi rektori Muzaffar Komilov kirish so‘zi bilan ochib berdi. Akademiya rektori so‘zining avvalida barchani kirib kelayotgan yangi yil bilan tabrikladi. Tinchlik-xotirjamlik, oilaviy totuvlik, kasbiy barkamollik, sihat-salomatlik tiladi.

Shundan so‘ng Akademiya “Talabalar teatr studiyasi” tomonidan “Yangi yil sarguzashtlari” nomli sahnalashtirilgan ertak-spektakl namoyish etildi.

Yunus Rajabiy nomidagi o‘zbek milliy musiqa instituti talabalarining kuy-qo‘shiqlari, O‘zbek davlat sirki aktyorlari, ko‘zboylog‘ich, akrobatlari ijrosidagi shou chiqishlar, ertak qahramonlari bilan raqslar tadbirga yanada fayz ulashdi.

Qorbobo tomonidan she’r yoki qo‘shiq aytgan bolajonlarga sovg‘alar ulashildi.

Tadbir yakunida Akademiya xodimlari va professor-o‘qituvchilari farzandlariga bayram sovg‘alari hadya qilindi. Akademiya tomonidan professor-o‘qituvchilar va xodimlarning farzandlari uchun 29 xil turdagi o‘yinchoqlar va shirinliklardan iborat 384 dona “Yangi yil sovg‘asi” bolajonlarga unutilmas tuhfa bo‘ldi.