Talabalar uchun hamkorlikda dars mashgʻulotlari o‘tkazildi

Mumtoz sharq filologiyasi “Psixologiya (din sotsiopsixologiyasi)” taʼlim yoʻnalishi 3-kurs rus guruhi talabalari professor Zebo Kasimova boshchiligida M.V.Lomonosov nomidagi Moskva davlat universitetining Toshkent shahri filialiga tashrif buyurdilar. 

Tashrif chogʻida Moskva davlat universiteti “Psixosemantik tadqiqotlar” laboratoriyasi katta ilmiy xodimi, psixologiya fanlari nomzodi Olga Mitina tomonidan psixodiagnostika fani boʻyicha dars mashgʻulotlarida ishtirok etildi. 

Din psixologiyasi va pedagogika kafedrasi tomonidan amalga oshirilayotgan mazkur tadbir talabalar akademik mobilligi doirasida bir oy muddat oʻtkazishga moʻljallangan boʻlib, ushbu davrda talabalar psixodiagnostika moduli boʻyicha kasbiy kompetensiyalarga, laboratoriya ishlariga doir bilim, koʻnikma va malakalarini filial bazasida tashkil etilgan psixologik laboratoriyalarda sinab koʻrish imkoniyatiga ega boʻladilar. 

Shuningdek, talabalar din psixologiyasi va psixologiya turkumidagi ixtisoslik fanlaridan tayyorlanayotgan kurs ishlari, bitiruv malakaviy ishlari boʻyicha tajriba-sinov ishlarini tashkil etish, metodikalarni toʻgʻri tanlash, oʻtkazish hamda natijalarni qayta ishlash kabi koʻnikmalarga ega boʻlishlari koʻzda tutilgan.