Talabalar Muftiy Boboxonovlar sulolasi hayoti va faoliyati bilan yaqindan tanishdi

Oʻzbekiston xalqaro islom akademiyasi “Islomshunoslik” yoʻnalishi 3-kurs talabalari uchun “Muftiy Boboxonovlar jamgʻarmasi”ga ekskursiya uyushtirildi.

Ekskursiya davomida Jamgʻarma direktori Amirsaid Usmonxoʻjayev ishtirokida “Oʻzbekiston musulmonlari idorasining Sovet Ittifoqi davridagi faoliyati (1943-1989) va Muftiy Boboxonovlar sulolasi” mavzusida davra suhbati tashkil qilindi.

Tadbir davomida butun umrini mamlakatimizda islom dini ravnaqi va musulmonlar manfaati yoʻlidagi xayrli ishlarga bagʻishlagan Muftiy Boboxonovlar oilasi ham dinimiz fidoyilaridan ekani taʼkidlandi. Muftiy Boboxonovlar sulolasi hayoti va faoliyati, ularning din qaygʻusida jon kuydirish, xalqni maʼrifatli qilish, islom dini sofligi, musulmonlar birdamligi, mamlakatda islom dinini turli bidʼat va xurofotlardan tozalash, dindorlar oʻrtasidagi ixtilofli holatlarga barham berish borasidagi sharafli xizmatlari haqida soʻz yuritildi.

Keyingi yillarda hukumatimiz koʻmagida Muftiy Boboxonovlar sulolasi haqida, kitob, ommabop risola va turkum maqolalar chop etilib, ularning dinimiz va yurtimiz ravnaqi yoʻlida qilgan ishlarini keng ommagan targʻib qilinyapti. Bu esa u zotlarning yorqin xotirasiga hurmat-ehtirom va ularning xayrli amallari doim el yodida ekanini bildiradi.