Yong‘in xavfsizligi qoidalariga amal qiling!

Kunlar qisqarib, havo sovib borishi sayin isitish moslamalariga ehtiyoj ortib boradi. Bu davrda tabiiy gaz yoki muqobil yoqilg‘i mahsulotlaridan foydalanish hajmi keskin oshadi. Buning natijasida bu kabi texnik vositalardan foydalanish chog‘ida ehtiyot choralariga amal qilmaslik holatlari ko‘p uchraydi. Natijada yong‘in xavfi kelib chiqish ehtimoli ortadi. 

Shu kabi favqulodda vaziyatlarning oldini olish maqsadida bugun O‘zbekiston xalqaro islom akademiyasida davra suhbati bo‘lib o‘tdi.

Unda Akademiya Ilmiy ishlar va innovatsiyalar bo‘yicha prorektori Zohidjon Islomov, Shayxontohur tumani 3-sonli ichki ishlar bo‘limi huquqbuzarlik profilaktika katta inspektori, kapitan Muhriddin Hikmatov, Toshkent shahar Favqulodda vaziyatlar boshqarmasi Shayxontohur tumani vakillari, katta leytenantlar – Xojiakbar Saydaliyev, Rasul Mamasonov, kichik serjant Shukurillo Nishonboyev, Akademiya Texnik-foydalanish va xo‘jalik bo‘limi xodimlari hamda talabalar ishtirok etdilar.

Davra suhbati davomida birinchi galda professor-o‘qituvchilar, xodimlar hamda talabalarning yong‘in xavfsizligi masalalarida bilim va ko‘nikmalarini oshirish hamda ularda shaxsiy xavfsizlik madaniyatini shakllantirish muhimligi ta’kidlandi.

Profilaktik tadbirda talabalar o‘rtasida yong‘inlar, is gazidan zaharlanish yoki havo-gaz aralashmasining chaqnashi bilan bog‘liq favqulodda vaziyatlarning oldini olishga qaratilgan tushuntirish va targ‘ibot ishlari olib borildi.

Yong‘inlar, is gazidan zaharlanish va havo-gaz aralashmasi chaqnashining ayanchli oqibatlari, ushbu fojialardan saqlanish choralari haqida ma’lumot berildi.

Shuningdek, xodim va talabalardan Akademiyadagi elektr, gaz va issiqlik ta’minoti qurilmalarini doimiy nazorat qilib borishi va ulardan foydalanishda yong‘in xavfsizligi talablariga rioya etish, xonani isitishda gaz plitasidan foydalanmaslik so‘raladi.

O‘zbekiston xalqaro islom akademiyasi

Matbuot xizmati