Buyuk ma’rifatparvar Mahmudxo‘ja Behbudiy – avlodlar e’tirofida

Mahmudxo‘ja Behbudiy Turkiston jadidchilik harakatining yetakchisi, buyuk jamoat arbobi, mutafakkir alloma, yozuvchi va o‘zbek dramaturgiyasi asoschisi hisoblanadi. Ta’kidlash kerak, so‘nggi yillarda ma’rifatparvarning hayoti va ijodini o‘rganish hamda uni yoshlar orasida targ‘ib qilish borasida keng ko‘lamli ishlar amalga oshirilib, ilmiy konferensiyalar, adabiy uchrashuvlar o‘tkazilmoqda.

Ana shunday tadbirlardan biri poytaxtimizdagi Adiblar xiyobonida joylashgan Mahmudxoʻja Behbudiy haykali qarshisida tashkil etildi.

“Buyuk ma’rifatparvar Mahmudxo‘ja Behbudiy – avlodlar e’tirofida” mavzusidagi ma’naviy-ma’rifiy uchrashuvda Kinematografiya agentligi bosh direktorining birinchi o‘rinbosari, filologiya fanlari nomzodi, dotsent Shuhrat Rizayev, O‘zbekistonda xizmat ko‘rsatgan madaniyat xodimi, Qoraqalpog‘iston xalq shoiri Rustam Musurmon, Akademiya professor-o‘qituvchilari, magistrlar hamda talabalar ishtirok etdi. 

Adabiy tadbirni Ilmiy ishlar va innovatsiyalar bo‘yicha prorektor Zohidjon Islomov kirish so‘zi bilan boshlab, davlatimiz rahbari tashabbusi bilan Mahmudxo‘ja Behbudiy, Munavvarqori Abdurashidxonov, Abdulla Avloniy singari ma’rifatparvar bobolarimizning davlatimizning “Buyuk xizmatlari uchun” ordeni bilan taqdirlangani milliy o‘zlikni anglash, hurriyat yo‘lida jon fido etgan bobolarimiz xotirasiga ko‘rsatilgan cheksiz hurmatning amaldagi isboti ekanini ta’kidladi. 

Shundan so‘ng so‘zga chiqqanlar yig‘ilganlarga adib hayoti va ijodi, ilmiy-ma’naviy faoliyati haqida qiziqarli ma’lumotlar berishdi. 

Mahmudxo‘ja Behbudiy mamlakat taraqqiyotini nainki maktablar, balki teatr, adabiyot rivoji, bir necha tillardan, dunyoda kechayotgan voqeliklardan xabardorlik bilan ham uzviy bog‘lagani qayd etildi.

Uchrashuv davomida “Mahmudxo‘ja Behbudiy nomidagi maxsus stipendiya” sovrindorlari so‘zga chiqib, mutafakkir hayoti va ijodi, ilmiy faoliyatiga oid qiziqarli ma’lumotlar berishdi.

Tadbir tashkilotchilari O‘zbekiston xalqaro islom akademiyasi tomonidan buyuk ma’rifatparvar bobomiz Mahmudxo‘ja Behbudiy ijodini chuqur o‘rganishga qaratilgan amaliy ishlar bardavom olib borilishini ma’lum qildi. 

Oʻzbekiston xalqaro islom akademiyasi 

Matbuot xizmati