Oksford islom tadqiqotlari markazi stipendiya grantini e’lon qiladi

Oksford islom tadqiqotlari markazi tomonidan 2022/2023-o‘quv yili uchun ilmiy-tadqiqot olib borish maqsadida stipendiya tanlovi e’lon qilindi.

Dastur 2022-yil oktabr oyidan boshlanadi. Mazkur stipendiya O‘zbekiston Respublikasi fuqarolari bo‘lgan 2 nafar yetuk olim yoki doktoranturani bitirgandan keyingi davrda tadqiqot olib boruvchilar uchun taqdim etiladi.

Dastur doirasida 5000 funt sterling miqdoridagi stipendiya tadqiqot olib borish uchun ajratilgan grant sifatida taqdim etiladi.

Mazkur stipendiya islom olamini o‘rganish bilan bog‘liq bo‘lgan gumanitar va ijtimoiy fanlar, xususan, antropologiya, iqtisodiyot, geografiya, tarix, xalqaro munosabatlar, huquq, adabiyot, falsafa, siyosat, din va sotsiologiya kabi yo‘nalishlarda tadqiqot olib borish uchun ajratilgan.

Nomzodlar mazkur muddat davomida tadqiqot ishlarini olib borish va maqolalar yozishga bag‘ishlashlari va Markazning ilmiy faoliyatida ishtirok etishlari ko‘zda tutilgan.

Nomzodlarga Markazning umumiy o‘quv xonalaridan foydalanish huquqi beriladi hamda turar joy topishda ham yordam ko‘rsatiladı.

2022-yil 28-yanvar sanasi hujjat topshirishning oxirgi muddati etib belgilangan.

Eslatma: tanlovda ishtirok etishni istovchilar O‘zbekiston xalqaro islom akademiyasi Xalqaro hamkorlik bo‘limiga murojaat etishlari mumkin.