Akademiya vakillari xalqaro konferensiyada ishtirok etmoqda

O‘zbekiston xalqaro islom akademiyasi hamda Rossiya Federatsiyasi Bolgar islom akademiyasi o‘rtasida imzolangan Anglashuv memorandumiga binoan Akademiya vakillari “Rossiya musulmonlarining diniy merosi” mavzusidagi 3-xalqaro forumda ishtirok etmoqda.

Forum doirasida tashkil etilgan “Rossiya va xorijda musulmon yoshlarning fuqarolik o‘ziga xosligini shakllantirish” III xalqaro talabalar ilmiy-amaliy konferensiyasida O‘zbekiston xalqaro islom akademiyasining bir guruh o‘qituvchi hamda talabalari o‘z ma’ruzalari bilan qatnashmoqda. 

Ilmiy-amaliy anjuman “Etnik, din va madaniyatlararo aloqa”, “Millatlararo va konfessiyalararo totuvlikni mustahkamlashda yoshlarning roli”, “Yoshlar tashabbuslari va muhitida millatlararo muloqotni uyg‘unlashtirish amaliyoti” hamda “Rossiya Federatsiyasi musulmon yoshlari: ijtimoiylashuv va bag‘rikenglik” kabi turli seksiyalarga bo‘lingan. 

Unda Akademiya vakillari “Islomda ijara shartnomasini tuzish shartlari”, “Islom dinining Markaziy Osiyoda tarqalishida Qutayba ibn Muslimning o‘rni”, “Tarixni o‘rganishda islom tarixining ahamiyati”, “O‘zbekiston va Rossiya o‘rtasidagi ziyorat turizmni rivojlantirishda yoshlarning o‘rni”, “Ziyorat turizmining yoshlar psixologiyasiga ta’siri”, “Islom hamkorlik tashkiloti va Mustaqil Davlatlar Hamdo‘stligi o‘rtasidagi hamkorlikning dolzarb masalalari”, “Masofaviy ta’lim: yoshlar uchun yangi imkoniyatlar” kabi mavzularda ma’ruza qilmoqda. 

Shuningdek, safar davomida delegatsiyamiz a’zolari soha rivojiga bag‘ishlangan xalqaro darajadagi ilmiy-amaliy konferensiya bilan bir qatorda mazmunli va foydali hamkorlik uchrashuvlari, mahorat darslari, o‘zaro tajriba almashinuvi borasida o‘tkaziladigan tadbirlarda ham ishtirok etishadi.

Akademiya delegatsiyasining safari davom etmoqda.

O‘zbekiston xalqaro islom akademiyasi

Matbuot xizmati