Akademiyada dolzarb mavzuda tadbir o‘tkazildi

Har yili 25-noyabr – Xotin-qizlarga nisbatan zo‘ravonlikka barham berish xalqaro kuni sifatida dunyo miqyosida keng nishonlanadi. Ushbu sana BMT tashabbusi bilan joriy qilingan bo‘lib, ayollarni tahqirlash, kamsitish, jinsiy, iqtisodiy, psixologik yoki jismoniy zo‘ravonlikka qarshi kurashning ramziga aylangan.

Shu maqsadda bugun O‘zbekiston xalqaro islomshunoslik akademiyasida “Xotin-qizlarga nisbatan raqamli zo‘ravonlik – zamonaviy tahdidlar va himoyalanish yo‘llari” mavzusida davra suhbati o‘tkazildi.

Tadbirda Toshkent shahar “Jayhun o‘g‘loni” advokatlik byurosi rahbari, advokat Xudoyor Masharipov, “Zamonaviy axborot-kommunikatsiya texnologiyalari” kafedrasi professor-o‘qituvchilari, tyutorlar hamda talabalar ishtirok etishdi.

Davra suhbatini “Zamonaviy axborot-kommunikatsiya texnologiyalari” kafedrasi dotsenti Mavlud Xodjayeva ochib berdi. 

Tadbirda xotin-qizlarni tazyiq va zo‘ravonlikdan himoya qilishning huquqiy-me’yoriy asoslari, raqamli xavfsizlik bo‘yicha yoshlar bilimini oshirish, onlayn muhitda o‘zini himoya qilish ko‘nikmalarini shakllantirish hamda xotin-qizlarga nisbatan raqamli zo‘ravonlikka qarshi ongni kuchaytirish kabi mavzularda so‘z yuritildi.

Shuningdek, mamlakatimizda amalga oshirilayotgan islohotlardan ko‘zlangan asosiy maqsad, eng avvalo, inson huquq va manfaatlari, jumladan, xotin-qizlarning huquq va erkinliklarini himoya qilish ekanligiga alohida ahamiyat qaratildi.