Ziyorat turizmining transformatsiyasi: anʼanaviy qadriyatlar va zamonaviy yechimlar

Ziyorat turizmi bugungi kunda nafaqat diniy qadriyatlarni saqlab qolish, balki jamiyatning ijtimoiy, iqtisodiy va madaniy rivojlanishiga ham ta’sir ko‘rsatuvchi muhim sohalardan biri hisoblanadi. Raqamli texnologiyalarning rivojlanishi hamda zamonaviy sayohat xizmatlarining kengayishi natijasida ziyorat turizmini yangi bosqichga olib chiqish zarurati tug‘ilmoqda. 

Shu munosabat bilan bugun Toshkentdagi Singapur menejmentni rivojlantirish institutida “Ziyorat turizmining transformatsiyasi: anʼanaviy qadriyatlar va zamonaviy yechimlar” mavzusida davra suhbati bo‘lib o‘tdi. 

Mazkur tadbirda O‘zbekiston xalqaro islom akademiyasi rektori Muzaffar Komilov, Toshkentdagi Singapur menejmentni rivojlantirish instituti rektori Ilhom Mamatkulov, Turizmni rivojlantirish ilmiy-tadqiqot instituti direktori Yelena Golisheva, Turizm qo‘mitasi bo‘lim boshlig‘i Begzod Murodullayev, O‘zbekiston xalqaro islom akademiyasi professor-o‘qituvchilari, soha mutaxassislari hamda talabalar ishtirok etdi.

Ushbu davra suhbati O‘zbekiston xalqaro islom akademiyasi, Toshkentdagi Singapur menejmentni rivojlantirish instituti hamda Turizmni rivojlantirish ilmiy-tadqiqot instituti hamkorligida tashkil etildi.

Unda ishtirok etgan turizm sohasining yetakchi mutaxassislari, mazkur sohada ilmiy tadqiqot olib borayotgan ilmiy izlanuvchilar va davlat idoralari vakillari tomonidan O‘zbekiston va xorijiy davlatlarda sohani rivojlantirishning dolzarb muammolari, vazifalari va istiqbollari muhokama etildi. 

Ushbu uchrashuvning asosiy maqsadi sohani rivojlantirishda raqamli texnologiyalar va innovatsion yondashuvlardan keng foydalanish hamda xalqaro tajriba almashinuvi orqali O‘zbekistonda ziyorat turizmini yanada rivojlantirish bo‘yicha tavsiyalar ishlab chiqishga qaratildi.

Tadbirda ekspertlarning “Ziyorat turizmi umumiy turizmning spetsefik segmenti”, “O‘zbekiston madaniy merosini asrashda 3D texnologiyalarining ahamiyati”, “O‘zbekistonda ziyorat turizmi, qadriyatlar va faktlar”, “O‘zbekistonda ulamolarga oid ziyoratgohlar va ularning turkiy xalqlar jamiyati uchun ahamiyati”, “Tasavvufda ziyorat masalasining talqini: o‘tmish va bugun”, “O‘zbekistonda ziyorat turizmi resurslaridan samarali foydalanishning zamonaviy mexanizmlari” kabi mavzulardagi ma’ruzalari tinglandi.

Davra suhbatining maqsadi ziyorat turizmini rivojlantirishdagi an’anaviy qadriyatlarning o‘rnini aniqlash, zamonaviy yechimlar orqali ziyorat turizmining iqtisodiy va ijtimoiy ahamiyatini oshirish, raqamli texnologiyalar va innovatsion yondashuvlardan foydalanish imkoniyatlarini o‘rganish, xalqaro tajriba almashinuvi orqali O‘zbekiston ziyorat turizmini yanada rivojlantirish bo‘yicha tavsiyalar ishlab chiqishdan iborat bo‘ldi.