Имом Мотурудий ижодига бағишланган Халқаро семинар ўтказилди

Имом Мотурудий ижодига бағишланган Халқаро семинар ўтказилди

Буюк алломаларимиз илмий-маънавий ижодини чуқур ўрганиш, улар хотирасини абадийлаштириш, келажак авлодларга ушбу бой меросни асл ҳолича етказиб бериш олдимиздаги муҳим вазифалардан бири.

Ўзбекистон Республикаси Вазирлар Маҳкамаси ҳузуридаги Имом Бухорий халқаро илмий-тадқиқот маркази ва Туркиянинг Мармара университети ҳамкорлигида Имом Мотуридийнинг “Таъвилотул Қуръон” асарининг манбаларига бағишланган онлайн-семинар бўлиб ўтди.

Унда Ўзбекистон халқаро ислом академияси профессор-ўқитувчилари, марказ илмий ходимлари ва юртимизда диний-маърифий йўналишда фаолият кўрсатаётган ташкилот ва муассасаларнинг ёш олим ва тадқиқотчилари ҳамда таниқли мотуридийшунос олим, Туркиянинг Мармара университети профессори Умар Челик иштирок этди.

Имом Бухорий халқаро илмий-тадқиқот маркази ахборот хизматининг хабар беришича, онлайн мулоқотда “Таъвилотул Қуръон” асарининг аҳли сунна вал жамоа тафсирлари орасида тутган ўрни, мазкур асарнинг Туркия кутубхоналарида сақланаётган нусхалари ва унинг бугунги кундаги аҳамияти мавзуларида фикр алмашилди.

Таъкидлаш жоизки, 2019 йилда Туркиянинг Мармара университети ва Имом Бухорий халқаро илмий-тадқиқот маркази ўртасида ўзаро ҳамкорликка доир меморандум имзоланган бўлиб, ушбу келишув доирасида ўтган давр мобайнида қатор истиқболли лойиҳалар амалга ошириб келинмоқда. Хусусан, жорий йилнинг январь ойида Мармара университети Илоҳиёт факультети доктори, профессор Юсуф Шавқий Явуз Имом Мотуридийнинг турк олимлари томонидан таржима қилинган 18 жилдлик “Таъвилотул Қуръон” асарини Имом Бухорий халқаро илмий-тадқиқот маркази кутубхона фондига ҳадя қилди. Бундан ташқари, ҳар икки давлат ёш олимларининг ўзаро тажриба алмашиши йўлга қўйилиб, халқаро илмий-амалий семинарларда иштирок этиб келмоқда.

Шу нуқтаи назардан, давлатимиз Раҳбарининг 2019 йил Имом Бухорий халқаро илмий-тадқиқот марказига ташрифи давомида берилган топшириқлари асосида айни вақтда марказ илмий ходимлари томонидан Имом Мотуридийнинг асарларини ўзбек тилига таржима қилиш ишлари жадал олиб борилмоқда. Мазкур онлайн-семинарда шу ҳақида маълумот берилди.

Ўзбекистон халқаро ислом академияси

Матбуот хизмати


Print   Email